當年今日
關於我們

【湯怡立立有唔妥?】等翠如做媒人 唐詩詠:千其唔好搵蕭正楠做藍本

蘋果日報 2018/07/16 16:41

杜汶澤黃翠如蕭正楠唐詩詠洪卓立湯怡田蕊妮失聲

唐詩詠同湯怡今日喺尖沙嘴出席服裝品牌活動,唐詩詠剛拍完《白色強人》,準備開新劇之際,日前返回廣州拍攝飲食節目,點知一抵步就失聲,工作人員川貝、草藥、咸檸檬都冇效,結果拍攝兩日都只能絲絲細語,唐詩詠話:「一返香港就冇事,人哋話係上火,喉嚨dry得滯,今次仲試咗炸榴槤,橫掂都失聲,原來好好味。」
唐詩詠甩拖後都好dry冇拖拍,佢表明想識男士,等朋友介紹,唔敢玩交友網,自己慢熱,配合唔到人哋節奏,唯有等黃翠如做媒,但等咗兩年都未有,明白佢要求好高,唐詩詠話:「千其唔好搵蕭正楠做藍本,佢五官當然靚仔,我驚我認錯人。」另一好友田蕊妮都冇好介紹,不過唐詩詠話:「佢老公識煮飯正吖,有內涵,都想搵個識煮飯、幽默、聰明男士。」
湯怡愛購物,衫、鞋、帽、黑超等令家中衣帽間擠迫,佢話都想換大屋,但要繼續努力。經常購物有冇令身邊人不滿?湯怡話:「媽咪會,老人家唔明白。」男友洪卓立呢?湯怡好避忌唔講男友,又指不知男友平時喜歡買乜嘢。咦?咁嘅答案好似有啲唔妥,直接問到佢係咪甩咗拖?湯怡話:「感情事唔講咁多,低調啲,我都講到悶。」咁講結婚?湯怡指:「呢兩個字從來冇喺腦裏面出現過,我得事業,嚟緊會開新戲同新網劇。」
精選娛聞,喺晒《娛果》
http://fb.com/appledailyent