乳腺癌康復者陳秋霞大病初癒，今晚接受《蘋果》電話訪問時表示：「好多謝大家對我關心，其實我病已經係舊年嘅事，隔咗咁多個月，我當自己好番晒啦，o依家仲食緊藥，呢隻藥一食要10年咁耐，唔緊要啦，當食補品。」

秋霞姐姐續道：「喺我患病期間，的確係有啲日子好難捱過，但我有家人同所信任嘅兩位醫生一直陪住我，有好多困難時間，我就將我嘅感受用筆寫低，所以有時失去一啲嘢，又賺咗一啲嘢返嚟，如果唔係有咁嘅經歷，我可能完成唔到我本書。」

「我成日都咁諗，我賺到嘅係o依家短頭髮，起碼0依家唔使再為白頭髮而煩，我可以真真正正用好fashion嘅形象同大家見面，多謝你哋，我好好！」

至於陳秋霞姨甥女鄺靄慧醫生，是香港大學臨床副教授和乳腺外科主任，被問到乳癌的發現及治療方法，她在電話說：「乳癌最常發現方法，係可以摸到硬塊喺乳房，或乳頭流血水，有啲女士可能冇乜徵狀，只不過係乳腺造影或超聲波發現腫塊，如果早期未必有任何徵狀。其他比較冇咁明顯徵狀，可能兩邊乳房唔對稱、乳頭有凹陷。」

「治療方法通常分幾種，外科做手術可以局部或全個切除，而全個切除可以做矯形方法，即係用義乳；其他治療方法有化療藥、標靶治療藥或抗荷爾蒙藥，仲有電療方法。」

鄺醫生稱，早期病人通常接受手術；若腫瘤比較大、或患者想用保存乳房手術，就會考慮用藥物化療或荷爾蒙藥，待腫瘤縮小後才安排做手術。鄺醫生補充稱：「好視乎佢係第幾期，有啲好早期未必一定要化療。」

相關新聞：
【初期以為耳水不平衡】患乳腺癌第二期 59歲陳秋霞四個月做8次化療
http://bit.ly/2vRoZu8

【家人陪伴左右】陳秋霞勇對癌魔 已回吉隆坡 鄺祖德：阿姨係非一般堅強
http://bit.ly/2wmBgGc