巫斯義停賽復出，季中騎「精彩鬥士」被競賽小組裁定未盡全力策騎遭重罰，由於老巫已經唔係第一次犯天條，一般估計佢騎埋今季都可以講拜拜。但係老巫自己就唔係咁睇，佢日前接受鬼佬報紙訪問時，話已經入紙申請下季全季公司騎師牌照，強調自己喺「精彩鬥士」事件清白之餘，仲好樂觀可以喺香港繼續佢嘅策騎事業。
老巫行動上照入紙申請下季公司騎師牌照，私底下係咪真係咁有信心留得低，得佢自己知。事實上，任何騎師都可以入紙，向馬會牌照委員會申請公司騎師牌照，但牌照委員會發唔發牌畀你，又係另一回事，牌委會發唔發牌都好，基本上唔使交代理由，騎師被拒都奈佢唔何。
除咗老巫要為下季牌照奔波，同佢一樣處境嘅仲有華將大哥大鄭雨滇，阿滇季初騎「軍駒」未盡全力被重罰，停賽復出後經過一輪低潮，最近表現叫做開始復蘇。
由於阿滇亦唔係首次犯天條，有唔少傳言都話佢下季未必有牌。老巫同阿滇下季究竟有冇牌，唔使幾耐就揭盅。平心而論，牌照委員會審理佢兩個嘅牌照申請時，考慮因素都係大同小異，一係兩個都有牌，一係兩個都冇牌，咁就一視同仁，大家都心服口服。不過，怪事時時有，牌照委員會嘅決定係咪一定咁正路？若然最終漏低一個冇牌，睇怕都會引發幾大爭議。

阿Joe