「人走茶涼」確實係sad，但曼聯未有同瑞典前鋒伊巴謙莫域續約後，尋找前線尖刀嘅任務確實係刻不容緩，喺「伊巴脫魔」消息不出數小時內，亦有多宗相關轉會消息進展。其中英國同西班牙傳媒廣泛報道，今季後備上陣居多、仍能為皇家馬德里喺各項賽事射入20球嘅24歲西班牙前鋒艾華路莫拉達，已經透過經理人向皇馬「攤牌」，表明有意入「魔」，只待兩間球會喺轉會費上達成共識；亦有西班牙電台聲稱，莫拉達將會以大約6,400萬鎊（約6.4億港元）加盟曼聯。

至於曼聯斟介另一獵物、28歲克羅地亞翼鋒比列錫就遇上阻滯，據英國《天空體育》報道，紅魔最新報價3,600萬鎊再次被國際米蘭拒絕，「藍黑軍團」堅持要收取4,400萬鎊（約4.4億港元）先肯放人。