當年今日

借錢出糧 - 左丁山

蘋果日報 2003/05/17 00:00


為沙士而設嘅一百一十八億元救市計劃之中,有三十五億元係貸款保證基金,為飲食、零售、旅遊、電影娛樂四個重災區行業提供出糧貸款。政府驚住銀行收唔番啲貸款,由政府補數,所以要每個借款公司嘅九成股東簽番擔保,九成係以股權計,唔係人頭計。
呢條橋唔係好行得通嘅,譬如餐廳羅想話借錢出糧畀夥計都好,佢啲股東冇人肯簽擔保,佢都冇符,即係借唔到錢囉。有一間食肆得幾位股東,但其中一位佔十點五巴仙,已經移咗民,其他人簽晒擔保都冇用。左丁山老早話出糧貸款基金唔多實用,就係呢個道理。
報紙報道開始申請貸款以來,反應冷淡,即使滙豐咁多客,亦只不過有百零間公司申請貸款。呢日左丁山行經中環某大廈天橋,聽到有位仁兄講手機(好多人揸住手機就以為隔籬冇人),竟然聽到呢句:「有冇搞錯呀,×××竟然申請借錢,佢老闆好出名嘅噃,應該唔好同啲中小企爭食啦!」
左丁山返到公司,打幾個電話,就索到料。呢間×××係可能因受沙士打擊嚴重,要利用呢個出糧貸款基金,向銀行借錢,暫濟燃眉之急。嚡,×××老細確係好出名,就因為太出名,官方機構知道佢嘅公司要借錢之後,好唔高興,覺得老細應該自己注資。不過既然已有借款準則,你又唔可以話唔畀大粒佬借嘅啫,呢個時候可以用P—3利息借到一百萬,做乜唔借噃。