【新增Sulli Ig內容及圖片】
由韓國男神金秀賢、成東日、f(x)前成員Sulli主演嘅新片《Real》將於下周三喺韓國上映，早前金秀賢已密密做宣傳，力谷呢齣事隔四年嘅新作。不過電影嘅打鬥場面太暴力，加上金秀賢同Sulli又有大膽床戲，所以《Real》已被定為19禁，未成年觀眾唔可入場觀看嘅三級片，唔知咁樣會唔會對票房有所影響？

之前有報道指Sulli當日拍呢場床戲時，因為有全裸鏡頭，所以拍攝時亦有清場，而上周四《Real》就有一次技術試映會，呢個試映會係畀工作人員喺真正首映前率先觀賞，同時亦會對電影進行討論，當日亦有討論有關Sulli嘅全裸鏡頭應唔應該刪除嘅話題。

由於唔少人都覺得呢場全裸戲十分大膽，加上對於偶像女團出身嘅Sulli來說係一次極大挑戰，對佢形象或多或少都會有所影響，所以現場人士都進行激烈嘅討論，最終就鐵定唔會刪除有關Sulli全裸戲，相關人士更話：「Sulli嘅全裸戲仍然留喺電影中。《Real》嘅素材同場面都好強烈。」

至於成日玩Instagram出事嘅Sulli，佢今日就上載咗一段短片即時被網民鬧爆，短片中佢就近鏡拍攝正在烤煮緊嘅活鰻魚頭部同埋尾部，之後仲配音話：「救救我，救救我」，唔少網民睇完片段即時留言狂轟佢腦殘，話佢咁樣拍住受痛苦嘅鰻魚好殘忍，佢只短短上載40分鐘就引來逾千留言狂轟佢，最後Sulli即急急刪除咗有關片段，但之後卻上載一張已烤好嘅鰻魚照片，兼反擊網民：「你哋以後唔好食鰻魚。」

另外，《Real》今日公開新劇照，當中喺片中一人分飾兩角嘅金秀賢就互相對望，其中一個金秀賢戴上透明薄膜面具，狀甚嚇人。