蘇麗珊、龍小菌、梁琤、楊羚、翁子光等，今日出席港台節目《同行者》喺奧海城舉行嘅分享會，蘇麗珊剛喺台灣旅行返港，指因航班延誤，佢落機就即趕嚟現場，又表示今次旅行同大學同學一齊去，男友游學修冇同行。

咁有冇艷遇？蘇麗珊笑言：「試過有餐飯，有男仔過嚟傾偈，因為同行嘅女仔朋友都係靚女。」蘇麗珊又稱與男友都會各自同朋友去旅行，認為大家要互相信任，又自認黐身，有時間就會黐住男友。

另外，龍小菌有份參與ViuTV真人騷節目《G-1格鬥會》已播出，其經理人喺facebook鬧參賽之一嘅劉燕妮（Rika），小菌表示：「佢成日都鬧人，但都認同落場就唔應該怪人唔留手，留力打都好似睇唔起對方啦！」佢又指：「我覺得好好睇，成班女仔狗咬狗骨真打，我自己就一向平心靜氣。」