莫文蔚老公伴奏浪漫咀嘴 為涉辱華MV服飾感失策內疚

蘋果日報 2021/06/14 18:05

莫文蔚紅館張學友李克勤
    莫文蔚（Karen）一連三場「絕色莫文蔚世界巡迴演唱會香港站」昨晚圓滿結束，尾場嘉賓分別邀請張學友及李克勤到來，Karen德國籍老公Johannes也上台為太太伴奏，踏入尾場情緒難免更易觸動，但Karen整晚狀態十足且表現堅強，只在尾段時感觸哽咽。
    尾場到來捧場的圈中人包括剛接種完科興第一針的汪明荃、梁詠琪、廖碧兒、林奕匡、謝茜嘉和老公、趙式芝、薛家燕、黃偉文、糖妹等。Karen繼續貼身舞衣作主打騷長腿登場，唱到《當你老了》送給媽咪後，莫媽媽在台下起身大力拍手支持。其間Karen感性表示：「今晚最後一晚，心情依依不捨，又好期待，會係最絕最難忘一晚，今晚打算唱爆紅館，係最後一次，大聲啲嗌。」

    等足學友35年

    Karen介紹學友出場前，表示自己等足學友35年，若然在唱歌生涯未能合作會是人生遺憾。學友出場後獲得熱烈歡呼，他謙虛表示很久沒有上紅館，綵排時不禁大叫一聲「紅館」，Karen指早在1992年時曾近距離接觸學友，「當時佢係神級巨星，我係十大傑出學生，喺一個戶外騷上以學生身份為學友伴舞。」螢幕展示當年照片，2人均十分青春，學友笑說：「邊有咁靚學生妹，我當時冇表示咩？我嗰時已經唔得。睇見都欷歔，Karen仲保持得咁好。」學友與Karen合唱《只想一生跟你走》、《離開以後》、《妳的名字我的姓氏》等串燒歌，久未在港踏台的學友竟說：「Karen冇考慮我年紀，我收到medley時即刻問可唔可以簡單啲，我而家學嘢好慢，記得好辛苦，不過都記到，會盡力。」Karen再分享昔日跟學友往事，她在1986年讀書時期擔任校刊編輯時，曾找來學友的超級fans同學去找學友簽名做校刊封面。另外學友叫現場fans以誠意打動Karen再開騷，「唔喺紅館唱，第日去另一個更大場地唱。」

    丈夫伴奏恩愛咀嘴

    演唱會尾聲時，Karen老公Johannes突現身舞台，夫妻對住彈琴，默契十足，Karen介紹老公時叫大家報以熱烈掌聲支持，其後Johannes為太太伴奏一曲《再生》，Karen大讚：「多謝晒，老公好叻，對住咁多人彈琴。」表演完後兩人在台上恩愛咀嘴。之後便到克勤出場，Karen指兩人相識28年來首次合唱，她說：「克勤係我大大大師兄，我93年正式踏足娛樂圈，克勤加盟星光唱片簽約時，我就係獻花畀佢位小妹妹，佢算係我恩人，帶我出嚟。當年克勤第一首歌《回首》MV我都有份拍，所以一定要請克勤嚟，先係prefect ending 。」

    告別紅館舞台

    完騷後Karen接受訪問時高呼：「好爽，雖然可以繼續唱，但覺得啱啱好，貴精不貴多。」嘉賓歌迷都戥今次她最後紅館演出不捨，Karen說：「唔會唔表演，只係轉個新科技新形式，或會網上演出。」屆時豈不是美腿絕迹？她笑說：「唔會，總有方法，或者好似學友講去比紅館仲大嘅場地演出，而家有走盞位，到時唔做大型，造巨型。」Karen自言今次碌盡人情卡邀請嘉賓，學友絕對是驚喜，她親自邀請對方一口答應，十分感動。她再次激讚說：「老公第一次上台演出，好犀利，佢彈琴好叻，但要對住觀眾做表演係兩回事。」並表示完騷後會將人交給老公以作報答。Karen整晚表現堅強沒有爆喊，她解釋：「唱到《Hey！如果》時，歌詞講離別好感動，係第一次公開演唱呢首歌，雖然好感動但唔喊得，因為接住就係同老公彈琴環節。」

    為MV服飾失策感內疚

    新歌MV因穿上被大陸網民列入涉辱華品牌D&G上陣，即被小粉紅狙擊，Karen承認有失策並感到內疚，跪低說：「呢兩日專注做show，今日清楚了解咗件事，係自己疏忽，冇得賴，平時着咩衫都唔care品牌，事實係需要care，今次冇留意到，造型師借咩我就着，話適合拍MV我都冇過問其他，係一個好好教訓，以後最細detail都要自己留意。」有指事件是受馬天佑連累，她說：「冇人想有任何事發生，整個團隊都唔想發生事。」為免敏感，新歌MV已下架，她說：「要整返好佢，但未知點做。」
    empty
    莫文蔚紅館演唱會昨晚舉行尾場。
    empty
    踏入尾場，莫文蔚瞓身演出，將最精采的獻給觀眾。
    empty
    李克勤擔任尾場嘉賓之一。
    empty
    莫文蔚跟舞蹈員全晚不時勁歌熱舞。
    empty
    莫文蔚全晚狀態弗爆，更堅強地忍着淚水。
    empty
    莫文蔚演出中西合璧。
    empty
    苦等35年，莫文蔚終於在紅館最後一次演出，達成心願跟張學友同台合唱。
    empty
    莫文蔚特意播出學生時代為學友伴舞的相片。
    empty
    莫文蔚擔任校刊編輯時，邀得學友簽名作為封面相。
    empty
    莫文蔚老公Johannes首次上台演出，為太太彈琴伴奏。
    empty
    Jonannes現身台上，獲全場報以熱烈掌聲歡迎。
    empty
    夫婦兩人在台上深情一吻，甜蜜非常。
    empty
    莫文蔚表示不會再踏足紅館開個唱。
    empty
    演唱會踏入尾聲一刻，莫文蔚步上長樓梯跟觀眾道別。
    empty
    一連三場紅館演唱會，終於結束。
    empty
    莫文蔚表示將自己交還老公，作為報答他的演出。
    empty
    莫文蔚對辱華MV服飾一事，感到失策及內疚。
    empty
    廖碧兒、莫媽媽與薛家燕在開騷前合照。
    empty
    汪明荃接受完疫苗注射後，便到紅館捧場。
    empty
    梁詠琪到場支持莫文蔚。
    empty
    黃偉文與倫永亮也是尾場座上客。
    -----------------------------
    蘋果App大升級 更簡潔更就手！了解更多（立即下載體驗）