呢兩日不時落大雨，如果喺屋企露台有種盆栽，就會發現容易滋生蚊蟲，如果唔想因為咁而唔要盆花，可以點樣預防蚊蟲呢？

旅遊服務業培訓發展中心（HITDC）總教導員（房務）許國華就教費清，除咗每星期至少清理一次花樽同花盆底碟積水，同埋使用已消毒、清潔無菌嘅植料之外，仲可以喺植料上加木炭屑，會有消毒作用。喺室外種嘅植物，因為會有露水同雨水，所以更易積水滋生蚊蟲，可以考慮種臭草、驅蚊草等有特別味道嘅植物驅蚊。

如果想喺露台種植物，一般會揀耐曬耐旱同比較粗生嘅植物，陽光較少嘅露台可以種鳳仙或萬壽菊，而陽光較多嘅露台就可以種玉蓮、蘆薈或洋紫蘇，呢啲植物喺一般園藝店或花店都可以買到。佢仲話，喺室外種植最好用比較重身嘅花盆，可以減少強風吹襲時花盆畀風吹郁嘅機會，亦要注意天氣變化，遇上狂風暴雨，記得將植物移入室內，以確保安全，平日落完雨，都要睇下植物有無畀雨水浸壞。無論喺室內定室外種植，最重要都係要確保空氣流通，有充足陽光水份，適當使用肥料。

仲有，植物只喺日間有光時，先會進行光合作用，吸入二氧化碳放出氧氣；但去到夜晚，植物就同人一樣，只會進行呼吸作用，吸入氧氣呼出二氧化碳，所以如果喺睡房放植物，夜晚佢就會同你「爭氧氣」，時間長咗分分鐘反而會傷害身體。

費清＃要生計，也要生活＃毋忘初衷