一泊二食，即係住一晚酒店，由酒店提供兩餐飯（當日的晚餐，第二天的早餐），大家相信對呢個概念並不陌生。

今晚同讀者Wayne去尖沙咀食北京烤鴨，坐喺露天位望住夜景吹住微微海風，同靚女食鴨，人生樂事呀！呢間餐廳最出名係用紅莓醬加爆炸糖點鴨皮做一食、用芥末點鴨胸做二食、再用傳統醬加餅做三食。一路食一路望住Wayne，她含羞答答的問我：「做乜唔食嘢，碌到對眼咁大望住我，有嘢諗緊？」

時間返到去兩個月之前，我同前輩Ronald坐喺我哋嘅私竇Monte Carlo天台食雪茄，佢手揸一部iPad開Linkedin，彈出彈入，我心諗放工時間仲咁勤力搵Candidate？之後Ronald問咗我一句：「呢個得唔得？」我睇一睇佢部iPad，咦，前新聞主播，現職企業PR，Profile靚仔，可以Hunt！

Ronald望我一眼之後說：「唔係叫你去睇佢Profile，我問緊你覺得呢條女得唔得！」噢，明白了，前輩又要復出，又要重操故業。唔明佢點解有女朋友仲要咁樣，我問：「靚都有咩用吖？你都有女朋友，阿嫂對你唔錯呀！唔通要換咩？」Ronald回答：「喺香港除咗一個女人唔可以換之外，或者要等2022先可以換；其他女人我想換就可以換，唔啱就換㗎啦，我同妳阿嫂冇乜將來，我哋好唔夾！唔好講佢啦，我仲有另外三個俾你幫下眼！」睇完另外三個之後我問Ronald：「前輩其實你係咪有Role做緊？」

「係呀！一泊三食。其實約個靚女Candidate真係有好多好處。第一可以用佢個樣加履歷表去Spec Resume（Speculative Resume，即係遮住Candidate個名同埋公最近幾份工作嘅公司名，send俾Line Manager或者Decision Maker，藉此達到一啲目的），你知啦嗰班大帝平時約極都唔出嚟，用張靚女相同埋用份靚CV釣吓魚，約一個Client Meeting或者出去飲杯咖啡都容易啲！

等我可以面對面同啲客介紹、解釋吓呢個靚女，順便推一推個客約我個Candidate做interview；第二，Candidate個餡梗係要正我先會Send俾啲客，多數都會有interview，分分鐘無心插柳反而造成一個Placement，當佢哋係A公司走出嚟之後，我就會喺B公司挖一個同類型嘅Candidate放返落去A公司嗰度，哈哈！最後啊，啲靚女平時咁難約，如果有interview，我仲唔大條道理咁樣約佢出嚟同佢傾吓計教下佢點樣見工，如果好彩幫佢搵到新工，又可以約佢出嚟食個Fine Dining慶祝吓。之後睇吓有冇下場啦！呢個一泊三食真係好正。」前輩沾沾自喜的滔滔不絕。「聽落好似幾好但係你又點知人哋有冇男朋友呢？」我問。「所以我每次見面嗰陣時，一定問佢哋兩個問題，問完之後自己心中有數。」Ronald說。「第一我會問佢哋，嚟緊呢份工，要Travel出差嘅比重都幾多，佢屋企人、老公或者男朋友會唔會介意？自己可以接受到幾多% travel？咁樣問睇吓佢係咪一個好好動、好Flexibe嘅人，同埋當然睇下佢有冇男朋友；第二我會問佢哋嚟緊有冇結婚或者生小朋友嘅打算，因為個客唔想請一請個人返嚟就要承擔Candidate放產假嘅風險，其實問咗呢兩條問題都知道佢哋係咪單身。哈哈哈！」

前輩玩Linkedin玩到出神入化，玩到好似玩Tinder咁樣，見係靚女就Drop一個好專業嘅message借機問人想唔想轉工，直頭公器私用。幫靚女搵到工固之然好，搵唔到工都可以攞個電話約出嚟食吓飯。又會咁有技巧咁樣問到佢哋係咪單身，我估呢個係佢嘅Signature問題，如果有人咁樣問你，呢個人好有嫌疑，好大機會就係我嘅前輩。

望住Wayne。其實我都想問下佢有冇諗住搵工，下一份工會唔會可以接受到Intensive Travel？

文：久保
人稱「全職獵人」獵頭界紅人，見盡獵場光怪陸離，商場奇聞軼事。
https://www.facebook.com/fulltimeheadhunter/

investMAN
For People of Style & Substance
掌握理財智慧 感受生活品味
http://facebook.com/investMAN.hk