小妹暑假想去台灣唞暑，去嚟去去都係台北、高雄、台中，都有啲悶，今次想搞啲新意思去吓好山好水嘅台東，食吓蟬聯台灣三屆食米冠軍嘅池上米，嘆吓家當造甜到飛起嘅鳳梨釋迦。最緊要小妹啱啱收到風，話華信計劃下月推出定期航機來回香港、台東，咁就唔使飛到台中或高雄再轉幾個鐘火車去台東咁麻煩。
台東縣縣長黃健庭親自嚟香港推介台東，噚日同小妹講，縣政府為方便自由行旅客上山下海反轉台東，推出三條觀光巴士線，旅客由6月26日至明年1月2日期間仲可以免費任搭。台東縣政府專員Carol補充，觀光巴士包括台東巿區線、台東縱谷線同台東海線，「觀光巴士線每條線套票定價原本是約200至300元台幣（約50至75元港幣），現在免費」。

將落實定期航機

縱谷線行車線從池上、關山一路經過鹿野、延平再到卑南，沿途田園葱葱；海線走經小野柳等沙灘岩岸；Carol話：「為方便旅客到蘭嶼、綠島，巴士會經往該兩地的碼頭上落客。」她說，每條線每日大約有八班車，約由早上8點發車，行經指定景點旅客可以自由上落車，「旅客可在台東火車站上車，毋須預約」。詳情可致電（25810933）台灣觀光協會香港辦事處查詢，或瀏覽台東縣政府網站 http://www.taitung.gov.tw。
康泰早前推出台東及花蓮包機直航團，康泰旅行社副總經理陳建鵬話，台東賣點可以睇到大自然風光，如果落實咗定期直航機，會吸引港人參加旅行團去玩；有埋免費觀光巴士，會方便咗啲自由行旅客。

電郵：mailto:[email protected]