韓國神劇《太陽的後裔》嘅宋仲基同宋慧喬於今年10月31日舉行世紀婚禮，雖然36歲嘅喬妹大過宋仲基4歲，不過喬妹拍埋去宋仲基度都唔會覺得年紀大過老公好多，兩公婆個樣仲越來越有夫妻相。

而喬妹日前先喺韓國孖老公去咗睇IU演唱會，兩人度過二人世界後，噚日喬妹就撇甩老公，飛咗去北京開工，據其事務所指喬妹此行到大陸出席三日兩夜嘅行程，但未有透露詳細內容。

喬妹素顏現身機場，無論韓國定各地網民都反應好熱烈，事關平時喬妹素顏示人，好多時都會戴上黑超同口罩，但今次佢冇戴黑超之餘，口罩亦拉低口咗，所以令佢素顏樣完全曝光，唔少網民都激讚喬妹天生麗質，仲話佢噚日嘅素顏樣，同佢17年前嘅成名作《藍色生死戀》時個樣差不多，當中有勁多網民都讚喬妹17年來個樣都冇變過，亦好羨慕喬妹keep得咁好。

更多韓流，喺晒《娛果》
http://fb.com/appledailyent