巴拿馬歷史性入世盃，舉國歡騰，總統巴雷拉（Juan Carlos Varela）就喺Twitter公告國民：既然係歷史性一日，周三全國放假！

由於美國輸波，而巴拿馬就喺落後下反勝哥斯達黎加2:1，最終搶走美國手上嘅入場券，歷史性首次入世盃決賽周。巴雷拉收到咁嘅喜訊，亦覺得全國應該好好慶祝一番，就喺Twitter寫：「我哋已經聽到人民嘅聲音，慶祝巴拿馬歷史性一天，就係聽日（星期三）放假。」佢之後又再出文話：「呢個係國家歷史一天，聽日所有公共同私營機構嘅打工仔都可以放假，學生亦唔使返學，留屋企同屋企人慶祝。」巴拿馬總統咁好人，睇嚟如果同巴拿馬總統有啲交情，應該有著數！

另外一提，巴拿馬贏波出現爭議。五十三分鐘追平哥斯達黎加嘅入波，多個慢鏡頭顯示個波未入哂白界，但裁判認為入球有效。門線技術要到決賽周先會用，巴拿馬人民有假都要多謝球證啦。