當年今日
關於我們

  坡佬落井下石趁病攞命 - 李八方

蘋果日報 2005/04/19 00:00


坡佬落井下石,新加坡總理李顯龍宣布,為加入新世界,刺激經濟,將會連開兩間新賭場!
香港開賭場,吟吟沉沉,噏咗成六七年!之不過,阿董頭巾氣,董班子話咁樣會助長賭風,又係得個講字。唔經唔覺,美資拉斯維加斯集團經已殺入澳門,澳門脫胎換骨,正所謂「沉舟側畔千帆過」,剩番董班子同一批道德壓力團體,睇住特區慢慢沉船!
都重係田少有眼光,講過支持大嶼山開賭場!唉,若果田少出埋嚟選特首咪好囉!點知,佢又唔敢行多步,話係不獲國家賞識,惟有打退堂鼓!
田少唔玩,咁大嶼山賭場就梗係流產!坡佬見機不可失切入空檔,即時趁病攞命,話要開賭場嘞!
執輸行頭 慘過敗家
新加坡唔講道德?坡佬唔保守?話去就去,全無包袱,執輸行頭,慘過敗家,就算特區𠵱家想話開賭場,都唔使諗咯!
其實坡佬明踩特區,早有徵兆!國父李光耀最近來特區,明寸話特區上面有一個「主人」,重有一班「附屬主人」,言下之意,即是話坡佬幸福好多,因為新加坡係獨立國家,自己至係自己嘅主人!
李光耀都算啜核咯!難為在座嘅香港VIP嘉賓,重拍爛手掌,以為李光耀係中國人民的老朋友㖭!
呢嗱,李國父一返祖家,即時做嘢嘞,新加坡開賭場,將來自由行大陸團,又分多一條水落新加坡,食住大陸貪官好賭呢條橋,坡佬今次發達。
日後想緝查貪官,中國又多一個目標嘞!



傳真︰2623-9278
電郵︰[email protected]