如果葉問可以一個打十個，你覺得勁到無倫！咁換轉李嘉誠頭馬霍建寧，一個打超過廿個，你又點睇？
霍建寧喺和黃（013）做咗董事總經理多年，有功兼有勞，人工自然亦步步高昇，上年加薪9%，1.88億元嘅年薪袋袋平安，平均計每日逗糧51.5萬元，人工冠絕所有藍籌最高薪董事是常識吧。
不過更令人聽到「嘩嘩聲」嘅係，經統計發現，25間藍籌中資股入面最高人工嗰個份糧，全部加埋都只係2.41億元左右。

建行董事長人工僅141萬

呢25間中資股中，最高人工嗰個，就係聯想（992）嘅楊元慶，年薪高達1.14億元。如果撇除呢個數，剩低24間最高薪董事人工總數約1.27億元。
唔好以為國企紅籌越大間，人工越好分，事實剛剛相反。建行（939）人工最高的董事係董事長王洪章，但全年人工只有141.1萬元，內地大地主華潤置地（1109），打工皇帝吳向東年薪不足86萬元。
咁樣反映兩個事實，一係國企高層的薪酬，「枱面數」真係好平！其次就係霍建寧人工真係天價，單係佢一個人份糧，已夠將上述24間中資股，最貴嗰個管理層盡收旗下……之餘，仲要有錢剩添。
以現時標準稅率15%計算，霍建寧好可能要交稅2,820萬元，而單係呢筆稅款，都夠請是但幾個國企打工皇帝了。
所以話，呢啲咪就係霍建寧「超級打工皇帝」嘅王者風範囉！真係唔羨慕得咁多。

李華華
mailto:[email protected]

【壹錘定音.李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk