林奕匡（Phil）今日去到商台宣傳即將推出嘅新歌，啱啱渡過咗33歲生日，阿Phil話喺泰國工作中渡過，工作好充實，由朝早八點做到晚上十點，提到生日願望，佢笑話：「乜唔係講咗出嚟唔好咩？主要係為健康同工作。」

聽日阿Phil將會嚟返大陸工作一日，後天就會啟程去到瑞典同倫敦10日，佢話：「今次去唔係玩㗎，好多嘢做，會同音樂人有所交流做crossover，jam歌，都唔會好緊張嘅，不過就要做多啲準備，忙係好事吖嘛。」佢仲話好少時間陪太太，太太都有微言，佢話：「真係好少時間，出去做嘢又唔方便帶住佢，怕佢會悶，所以噚日喺泰國返嚟第一時間就去見佢，車佢放工，都想陪吓佢，因為真係冇乜機會見，今日同佢食早餐嘅時候佢都講咗好多嘢。」

阿Phil話今年都冇機會放假去旅行，不過就mark定下年一月同屋企人去歐遊補數，佢仲預算花6位數字請晒兩家人，佢話：「因為父母都已經退咗休喇，兩家人一齊去玩，包晒冇所謂啦，唔緊要，一生人第一次嘛。」

精選娛聞，喺晒《娛果》
http://fb.com/appledailyent