中環在線：滙豐、蒙牛大灑金錢挽人心 - 李華華
蘋果日報 2008/10/10 00:00
強調唔使央行泵水
有朋友同華華報料，話噚日去滙豐銀行時，聽到有個客專程走去問啲職員，英國嗰邊係咪會有政府注資？心水清嘅讀者都知，英國政府前日話會攞500億英鎊為英國嘅銀行泵水；而有睇噚日報紙嘅都知，大笨象嘅執董兼亞太區CEO霍嘉治，已即時回應內部水源充足，唔使政府幫手咁話。講完都仲係有客戶唔知（或者唔放心），要親自去分行問個明白。
呢啲開銷唔慳得
為咗令事情清楚明白，大笨象今日喺報章登聲明，再向客戶強調「沒有計劃運用英國政府的注資方案」，兼且向倫敦嘅同業伸出援手，拆出約20億英鎊嘅3個月同6個月流動資金，今日仲會繼續，希望紓緩到同業借貸嘅困境，最緊要顯示到實力。一版廣告值幾錢，對大企業嚟講濕濕碎，若然呢招真係可以安撫人心，絕對值得使。
另一家要登全版廣告澄清嘅，係被三聚氰胺搞到冇人敢買嘅蒙牛。創辦人牛根生深明喺邊度跌低，就喺邊度企番起身，與其日日見報俾人列出旗下邊啲產品唔合格，不如自己檢測兼公佈，希望重拾消費者信心。
蒙牛話用咗8000萬人仔買咗檢測三聚氰胺嘅設備，又將通過香港食物安全中心檢測嘅16款產品名單，喺聲明度列晒出嚟，唔使勞煩各大傳媒，兼可以加多句──「讓廣大的香港市民放心飲用」。
蒙牛話用咗8000萬人仔買咗檢測三聚氰胺嘅設備，又將通過香港食物安全中心檢測嘅16款產品名單，喺聲明度列晒出嚟，唔使勞煩各大傳媒，兼可以加多句──「讓廣大的香港市民放心飲用」。