當年今日
關於我們

【搶先劇透】《製作人們》第五集孔孝真發火向車太鉉表白

蘋果日報 2015/05/29 06:00

蘋果香港韓國韓劇KBS即時IU金秀賢孔孝真Producer製作人製作人們羅俊模

承接剛剛《製作人們》講到卓藝珍(孔孝真飾)喺聚會同白承燦(金秀賢飾)、Cindy(IU飾)、羅俊模(車太鉉飾)等人相遇,而卓藝珍就因為怕白承燦會喺聚會上飲醉酒,踢爆佢同羅俊模同居一事,就多次提醒佢唔好飲咁多酒,點知卓藝珍自己就飲醉酒,仲自爆同羅俊模一齊住,之後仲喺條街撒嬌拉走羅俊模同白承燦,話要同佢哋一齊去食好嘢。

點知佢哋去到間街邊食店,卓藝珍同羅俊模就突然鬥嘴,仲突然之間同羅俊模表白,之後就醉到瞓咗喺枱。鏡頭一轉,卓藝珍就喺自己房瞓醒,咁啱羅俊模都出房門,卓藝珍就勁尷尬。之後卓藝珍見到白承燦瞓喺廳,就突然之間向白承燦發火。

卓藝珍返到公司之後就拉白承燦上天台,仲問佢噚晚聽到啲咩,點知白承燦記得晒卓藝珍同羅俊模表白嘅時,卓藝珍為咗封住白承燦個口,就畀錢佢賄賂佢,仲叫白承燦八下羅俊模究竟有冇聽到啲咩。

之後見到卓藝珍好可憐咁一個人喺天台,白承燦就同卓藝珍講如果佢有咩唔開心可以直接同佢請,佢好樂意聽,令卓藝珍好開心。