拍完無間道三集之後接受過一生人最多嘅訪問，訪問內容裏面經常提到一個問題：「你有冇覺得自己救咗個市或者救咗個電影圈呢？」嘩！問個咁嘅問題真係好得人驚，即刻諗都唔使諗答：「梗係冇啦！點會關我事呀？」大佬呀！我都係好彩救番自己，有半隻腳重喺個深淵入面。我唔係講風涼說話，亦都冇寫錯字，係深淵。過去一年，唔同嘅人對自己有唔同嘅期望，有人期望我拍多幾部好似無間道咁嘅戲；除非拍無間道四，無間道五，唔會有其他戲係好似無間道咁嘅。有人期望見到我同劉偉強分開，各自求求其其咁拍戲，只係想證實原來你兩個都不過係屎忽撞棍嘅啫，呢個世界係冇奇迹嘅；唔使證實，係冇嘅，有嘅只係合作嘅力量，團結嘅精神。阿媽期望我快啲結婚生仔，我惟有答：「快㗎啦，阿媽，等多陣先，就嚟得㗎啦！」原來人對你嘅期望係可以變成一個深淵，只因覺得你可以做多啲嘢，同嗰啲訪問問題一樣。

結果係我對以上所有人期望我嘅嘢都冇做過，我同劉偉強用咗十個月時間，拍咗另一部戲，七個月後會上映，叫頭文字D。最近有多啲空閒時間開始接受有關頭文字D嘅訪問，點知啲記者問問吓又問：「你拍呢部頭文字D，會唔會可以救市呀？」點解又係呢個問題。我開始反省，過去十個月電影市道係差，但係市場係會自動調節向着一個方向走，你想救都救唔嚟。我相信唔好做爛個市已經係好好嘅救市方法。