當年今日
關於我們

地產多聲道:買長實豪宅住總統套房

蘋果日報 2003/02/20 00:00


雖然已經過咗正月十五,新年氣氛都未完全消散,上映緊嘅賀歲片,由人氣歌手楊千嬅,同影帝梁朝偉擔演嘅《行運超人》,就吸引唔少人去睇過。
噚日長實軟銷佢哋嘅豪宅盤畢架山一號,為標榜個盤有酒店嘅豪華feel,就喺紅磡火車站旁嘅都會海逸酒店總統套房舉行記者會,今個月買畢架山一號嘅買家,有機會住呢個豪華總統套房。
套房非常豪華,全落地玻璃窗,對出有大片平台花園,重有迷你浴池。聽講,呢個咁舒適嘅套房,曾係《行運超人》嘅拍攝場地,四周都算開揚。相信唔少楊千嬅同梁朝偉fans,會好想入住呢個偶像拍過戲嘅場地。聽講唔少喺紅館開個唱嘅歌手,都住過呢個套房。

麥當勞道11號吳美珩捧場
最近由吳美珩(圖二)主演嘅電視劇收視唔錯,重播到接近尾聲,所以有唔少觀眾捧場。蘭西聽經紀講,中半山豪宅新盤麥當勞道11號,就得到吳美珩捧場。唔知佢睇完樓有冇扑槌呢?
由新世界同恒基發展嘅麥當勞道11號,都算喺近期市場焦點之一,全部係二千三呎嘅大單位。中半山新供應少,呢個盤開價唔平,最平要千三萬,呎價五千五。不過附近物業造價都相當參差,麥當勞道5號南方閣,四十七年樓齡,一個千二呎單位,三百萬有找,如果睇唔啱新樓,舊樓都可以考慮吓。
中原地圖人氣爆棚
𠵱家互聯網使用日趨普及,唔少人都習慣上網搵資料,中原執行董事張奕威對蘭西講,集團嘅中原地圖,瀏覽人次已經突破八千萬。
張奕威話,其實中原地圖嘅系統差唔多達到飽和,一日有二十小時嘅使用量達到九十七個巴仙,其餘四個鐘,都有六成幾。佢預計好快會爆棚,所以𠵱家諗緊將現有系統擴充一倍,或者改用光纖,咁就唔怕會出現「塞車」嘅情況。

50蚊坐熱氣球
用熱氣球為樓盤做宣傳,長實天水圍慧景軒可算是第一個。昨日,熱氣球首度喺嘉湖銀座商場示範單位對出空地升空,長實高級營業經理劉啟文同幾位明星率先試坐。氣球升至五六層樓高,可以望到天水圍四周環境。今次宣傳活動係同世界(香港)自然基金會合作,原本坐熱氣球嘅費用要一百蚊,由本周起一連六個周六、日(除三月一日),參觀慧景軒示範單位人士,只要捐五十蚊,其餘五十蚊由長實捐出,便可乘坐熱氣球,每日大概有一百個名額。整個宣傳活動費用,預計要七位數字。
雖然宣傳活動好有新意,不過噚日遲咗超過一個鐘頭先開始,有啲掃興,希望下次準時。
太興燒味謝斐道落腳
蘭西日前聽市場講,銅鑼灣謝斐道五百號維安商業大廈嘅地舖,啱啱租咗畀太興燒味,現租客喜喜燒臘茶餐廳負責人趙生,噚日致電畀蘭西,澄清話喜喜冇將呢個舖位頂租出去。
趙生話,喜喜燒臘茶餐廳喺上址經營多年,租約仍未到期,會繼續經營。噚日啲客問佢點解唔做,搞到佢哋要解釋一番,就今次事件對喜喜集團引起嘅不便,蘭西講聲非常抱歉。
趙生話佢哋喜喜集團除咗維安舖外,喺灣仔史釗域道、駱克道同薄扶林華富邨都有舖經營飲食業,另油麻地偉晴街17號有自置燒臘工場。
太興燒味發言人話,佢哋冇租過維安呢個舖,但頂租咗喜喜隔鄰幾個號碼嘅舖位經營。

設計師滌濤山顯身手
嘉里建設早前搞咗個大埔滌濤山「私人花園設計大師賽」,攞咗六座別墅嘅花園出嚟,畀六家公司做設計,嗰啲公司嘅名同負責邊間屋,終於揭盅。
山城花藝負責設計花園面積千一呎嘅73號屋。麗華花園負責嘅75屋,花園面積近千二呎;而花園有千二呎嘅76號屋,就交畀綠苑環境美化有限公司做。77號屋嘅千六呎花園、78號屋嘅千七呎花園,同79號屋嘅近千八呎花園,依次由園藝廊、廣林花園同景緻佳公司負責。邊家公司勝出?四月公布。
蘭西
電郵地址:[email protected]
empty
(圖二)
empty
中原網上地圖瀏覽人次突破八千萬。