日本歌姬中島美嘉加入樂壇15年首次到台灣開騷，噚晚起一連兩日假台北國際會議中心舉行兩場個唱，中島美嘉為台灣粉絲安排特別曲目，當然唔少得被翻唱N次嘅代表作《雪之華》同埋主演電影《NANA》主題曲《GLAMOROUS SKY》同埋動人情歌《櫻花紛飛時》等，與台灣歌迷歡度平安夜。

演唱會開場播放中島美嘉歷年暢銷單曲嘅MV片段，佢戴黑色高帽、穿黑白色系蓬裙禮服坐住木馬出場，演唱《ORION》出場，兩名芭蕾舞dancer隨音樂翩翩起舞。舞台以美嘉最愛嘅蓮花為背景，兩側各有聖誕樹，美嘉拍住音樂拍檔手執星型手燈為兩側聖誕樹進行點燈。其間，美嘉即興改歌詞用中文唱出「我愛你」，歌迷聽到後即以尖叫聲回贈。之後美嘉以中文問候：「大家好，我是中島美嘉，OK？」33歲嘅美嘉於台上透露差不多10年前左右曾有人力邀到台灣開騷，不過佢自言當年冇自信，所以就推辭演出，呢次可謂如願見台灣歌迷，美嘉坦言從一開場已相當緊張，但就會努力唱到最後。美嘉全晚以3套造型演唱24首作品，雖然受到耳疾影響，演唱有時掌握不到音準或跟唔上拍子，但歌迷都已感受到偶像嘅誠意，紛紛報以熱烈掌聲。