「點解你買唔到樓」早兩日，曾經喺八年前發表地產經典鴻文《買樓10大誤解》嘅數字兄，再喺Forum出Post，標題正正係「點解你買唔到樓」，而第一個Point係四隻大字：「公屋之毒」。

數字兄個論點，大概係話公屋居民，因為願意接受較低人工，所以壓低整個香港的薪酬水平，即係拖低條Curve。我暫時唔討論數字兄個論點，但講到公屋問題，的確，公屋同私樓之間，出現咗個鴻溝！

朋友阿榮，由細到大同阿爸、阿媽，一家三口住公屋，穩定收入，月入28,000元，加埋勤力上進，佣金收入多，炒股又有一手，畢業幾年，都儲到成150萬。「嘩，好叻仔呀，可以成家立室啦！」哼！你以為啦，呢150萬正係佢大鑊嘅開始！

話說房委會已收緊公屋富戶政策，只要住戶入息或資產是但一樣，只要超出入息限額的5倍或100倍，就要被叮走。以一家三口為例，資產過咗224萬，就已經要同間屋講拜拜，結果阿榮因為叻仔，所以令到呢個家庭變成「公屋富戶」，從而令阿榮向鴻溝邁進。

於是阿榮就諗啦，「反正有150萬，都係時候自立買樓去！」不過，香港係好殘忍，唔係話有首期就買到樓！400萬樓，香港冇乜；就算你搵到個500萬樓；就算你All-in 150萬去做首期；就算你只造七成按，你都上唔到車，「先生，Sorry，你唔過壓測」！

情況即係點呢？就係政府就嫌你太有米，要你走；不過銀行就嫌你太窮，唔畀你上車。而你，就拎住嗰150萬，喺公屋同私樓中間個鴻溝，不停問自己「到底我係太窮定太有米」，問咗幾次之後，結果點呢？一係就舉家買二手綠表公屋（如果仲未畀人逼走，仲有綠表資格的話），然後短期內，再冇閒錢供多一層畀自己成家立室；另一個Choice，就只有租樓，即係幫人供樓。

唔係話要批判房委叮走富戶有問題，而係現行制度同癲價下，衍生出呢一類「首期以上，壓測未滿」嘅「公屋二代夾心人」－－月薪搵得OK，但唔算好多，但同時儲到錢，不過冇得住公屋，但又買唔到樓。

「唓！冇錢就買唔到樓啦，呻咩！」但當個社會制度係，即使你叻仔儲到錢，唔代表有獨立置業嘅選擇；就算你再叻多少少，收入多啲，都只係買到間仲逼過原先公屋嘅劏房。想問，呢個城市到底有幾鼓勵「公屋二代」脫離公屋？「唓，我間公屋有海景、有空中花園、間隔實用、冇發水窗台，我點解要咁辛苦自己儲錢去買劏房，做樓奴呀？咁唔抵！」

一個城市，有一大批後生仔，連上流動機都失去，城市可以點進步？
「嗯…冇咩嘅話，我都係返出去，睇吓買咩車，去邊度旅行，食好西算。」

by千頌C@堆填區
http://fb.com/winbigwok