近來電影公司嘅宣傳攻勢，越來越識得引起一般大眾共鳴，大談丁屋問題嘅《竊聽風雲3》就不在話下，至於由影帝張家輝同埋鄭秀文主演嘅《失戀急讓》最新宣傳片，單憑一句對白，就血淋淋的講中唔少無殼蝸牛心聲。

宣傳片入面，張家輝以物業代理項少龍（噢！尋秦記？）身份，以「化骨龍」Mode推介本周筍盤。至於所謂筍盤，其實係講佢自己，不過呢個Point唔重要，最重要係最最最最後一句：「幾時係買樓時機？你買得起嘅時候，就係買樓時機。」

呢兩句真係畫龍點睛呀，聽起上來極度夭心夭肺。就正如啲基金Agent，往往Chok起一幅誠懇表情問你：「你目標幾時安居置業？」大佬，有錢咪置業囉！

好啦，假設你目標5年後好未，而你又落答幫襯佢買基金。一兩年後，世上其中一樣最慘絕人寰的事情發生了，就係你發現呢個Agent已安居置業，層樓係豪宅之餘，佢買埋架雙門Benz。然後有日佢出來同你Review你份基金，你見佢周身名牌，身光頸靚，佢會Chok出一幅無奈的表情答：「無計，慣咗買貴嘢，返唔到轉頭。」

呢個時候，你回想昔日那句：「你目標幾時安居置業？」，其實潛台詞係：「PK！咪講咁多，你幾時先肯幫我置業呀？」

by千頌C@堆填區
【收市閒情】facebookfanspage
https://www.facebook.com/winbigwok