講開加租，酒莊Ｍ最近聽聞，位於威靈頓街、雲咸街交界之賽馬車會就快搬竇，因為業主要加租，賽馬車會計過數，要搬喎。搬去邊呢？酒莊Ｍ聽到話會去都爹利街之西洋會。都爹利街比較靜啲，自由行遊客唔會去，蘭桂坊客唔會到，租金應該比較平啲啩。
賽馬車會外嘅人流，唔算好多，做零售店未必易做，不過佔地三層（連地庫），假如有人購入，重新間隔為小商場，每間店舖佔地一百呎左右，再分開出售，或者有利可圖啩。呢類投資，已成風氣，大戶着數，小戶唔該注意自己財務狀況。

講起賽馬車會，好耐冇去過，以前去親都係外滙Ｄ、律師Ｋ請食午飯。呢度蒸條小石斑，唔會失手勢，兩三個人啱啱好。外滙Ｄ與律師Ｋ都係好食石斑之人，次次都帶挈益到左丁山。以後搬去西洋會會所大廈嘅話，與原來地方相距甚近，生意應該冇乜影響。
酒莊Ｍ除咗賣歐洲酒之外，亦賣歐洲植物油，以橄欖油為主，橄欖油係地中海地區最多人使用嘅食油，屬健康食物。香港啲新派餐廳，特別係以健康食物為號召之餐廳，都用橄欖油。酒莊Ｍ話：「生意分布並不平均，一間老牌名店每個月用好少橄欖油，一間小店就用個不停，成日攞貨，令我大出意料之外。你成日周圍食飯，要注意健康，多幫襯用橄欖油嘅餐廳，對你身體有益。」於是向佢問路，答案自然不便在此透露，酒莊Ｍ只係講咗少少，就趕住去會展睇檔。
今年之「食品及設備展」，會場佔咗會展中心三層，簡直人山人海，門限為穿。咁多人嚟香港參展，唔怪得啲酒店房貴晒。富翁Ｖ一位老友以前住尖東酒店，識得高層有大折扣，套房只收八百蚊一晚。今年同樣有咁多折扣，但價錢就升到二千蚊一晚，富翁Ｖ老友牙痛咁聲，但係冇折扣之普通客戶豈非更加痛到要剝牙？