《福祿壽十周年演唱會》今晚開鑼，三個扮嘢王8點45分登場，毫無疑問，係型嘅。

三位主角以超級英雄造型登場——王祖藍反串扮神奇女俠、阮兆祥化身美國隊長，李思捷就蒙面做蝙蝠俠，齊齊載歌載舞抄熱氣氛。三人合唱第一首《踢拖》，唱完先係主菜——吹水，李思捷話：「我哋唔知係咩組合，竟然可以10周年兩次上嚟紅館，好多謝你哋！」台下嘅汪明荃、朱晨麗、田蕊妮、蘇玉華、吳業坤、何遠東、陳敏之兩公婆都拍爛手掌，就連鄧兆尊同兩位紅顏知己都嚟捧場。

王祖藍又話：「十年嚟最唔同，就係依家成日見阮兆祥，周一至日都見到阮兆祥，唔想見佢，打開電台又聽到佢個節目。」阮兆祥就話：「現在喺大陸電視台，浙江衛視、湖南衛視、中央電視台都見到佢 (王祖藍)，惟獨係翡翠台見唔到佢。」點知王祖藍話：「李思捷以前份份雜誌都見到佢，一係就春卷、一係就邊個，點知十年後冇喺雜誌見到你，究竟點解？」阮兆祥淡然謂：「因為佢以前鹹囉！但時間沖淡一切。」

今晚頭場有嘉賓，嘉賓係李司棋，出場唱《啼笑姻緣》，之後李思捷再出場，扮陳欣健跳唱位元X廣告；緊接住另一個「那些年」嘅廣告又登場——係X光檸檬茶，細細粒陳嘉佳扮學生妹，同李思捷做男女主角，現場仲有部自動販賣機，果然製作認真！