隔牆有耳:誰是西九龍皇帝? - 李八方
喺一片官商勾結、唔要天幕嘅批評聲中落馬嘅西九文娛區計劃,噚日再推出諮詢文件,西九係九龍區最靚地皮,操縱整幅成40公頃土地規劃大權嘅西九管理局雖然仲未成立,有人就形容得西九、得天下,邊個做管理局主席可以話係「西九龍皇帝」。
西九落馬後由前任政務司司長許仕仁揸fit重新諮詢,肥龍係有承擔嘅人,既然佢領導嘅專責小組建議成立西九管理局,好多人「貼」佢順理成章坐正做「西九皇帝」,加上佢熱愛藝術文化,佢肯做嘅話政府真係深慶得人。不過噚日有人問佢會唔會做主席時,佢話「多謝嘞」,咁即係接受?佢笑笑口擰擰頭,冇明確表態。
有政壇人士指出,肥龍同大地產商郭氏關係密切人所共知,如果煲呔委任佢做西九皇帝,其他大孖沙可能好有意見,尤其係姓李嘅,煲呔願意將西九推倒重來,無非係想平息地產商明爭暗鬥,管理局擺錯位無疑自找麻煩;另一同肥龍有偈傾人士就話,肥龍係世外高人,好多嘢外人唔知,如果佢願意入局,自然有辦法擺平各界利益,其他人少擔心啦。
如果肥龍唔做,搵書法自成一家嘅「九龍皇帝」曾灶財做西九皇帝本來好啱數,可以充份發揮本土文化,可惜佢老人家駕崩,退而求其次,八方建議搵創辦中國會同上海灘嘅鄧永鏘接棒,David周遊列國識盡天下名士,藝術品味、文化修養真係頂呱呱,據講佢早年買入唔少中國現代畫家作品,近年呢啲藝術品炒得火熱,身家自然水漲船高,可見佢眼光獨到,搵佢主持西九大局,相信政府唔使擔心做蝕本生意。
另一人選係海洋公園主席盛智文,佢為咗宣傳海洋公園真係做到「死」都冇計,連死人都肯扮,海洋公園喺佢領導下越搞越旺,打殘過江龍廸士尼樂園咁滯。八方希望盛智文認真考慮吓空降西九,將西九搞得有聲有色,再下一城。
政圈早前傳出兩位行會成員羅仲榮同周梁淑怡都有機做「西九皇帝/皇后」,官場中人話兩人各有長短,前者未知有冇魄力統領西九,後者做旅發局時醜聞頻生,如果委任佢做西九管理局主席,都係考慮得周詳啲好喎。