禮拜六跑馬，今午（16日）沙田第八場三班草地1200米，由綠燈有飛馬「萬馬奔騰」與大熱「財高八斗」分獲頭二名。「萬馬奔騰」幫呂健威馬房中三元，亦係華人騎師楊明綸季內首匹頭馬，單Win及組合獨贏A3分別派86.5及38元。

呂健威對上一次中三元已是2015年9月23日谷草夜馬，到今日佢勝出「幸福加數」、「鑽飾傳奇」及「萬馬奔騰」，遂成為佢馬房近兩年代表作，可喜可賀。「萬馬奔騰」贏馬後，呂健威亦帶埋養傷中的女徒蔣嘉琦一齊拉頭馬。

講番「萬馬奔騰」，呢場閘前落飛至8.6倍，其實仍偏冷，事關佢前仗(上季尾)挫1300磅大灰獸「平湖之星」建功，上仗開鑼日則於另一新晉灰色頭馬「五十五十」之後得第三，可謂賽績優秀，結果「萬馬奔騰」今場沿途前置下，末段加速強勁贏頸位，7歲英國馬獲在港第四Win。

反觀爭取跨季連捷的怪腳馬「財高八斗」(前腳步法似人類打麻將時雙手洗牌的姿勢)，今場11檔起步，嘥咗力埋欄領放，直路亦移咗出外叠，未能如過往贏馬般貼欄放頭，最終短兵相接下不敵後勁較強的「萬馬奔騰」只得亞軍，鞍上人李寶利因此打開唔到今季勝門。

第八場三、四名分別為落飛熱門「確威風」及冷馬「明月光」，四重彩派近三萬元。