又到中秋，除咗有嘉麟樓同美心流心奶皇月餅賣斷市，原來古巨基餅店Alice Wild Luscious推出嘅軟心芝士月餅，都成為藝人嘅搶手貨，好友鄭伊健同周慧敏都有免費幫基仔拍片宣傳，估唔到連嘴刁刁嘅黃秋生，食完都真心讚：「好食到好邪惡！」

之前挑機海南雞飯、凍水煮出前一丁嘅秋生，今次就試食基仔出品嘅芝士月餅，秋生接受《蘋果》電話訪問表示：「基本上我唔係月餅fans，叫做過節有就食吓，我個人選擇好傳統嗰啲，但傳統嗰啲好肥膩，唔係好追捧。」秋生話日前做舞台劇《搞大電影》，蒙嘉慧嚟捧場送咗芝士月餅畀佢，秋生話：「我喺後台咪食吓，見到個樣細細粒，嘩！點知一食，好食到不得了，第二日再食就淋，因為冇擺雪櫃，但淋都好食喎，佢話要放雪櫃，攞出嚟200度叮一叮，整到面燶燶哋仲更加好食，真係黐線，好食到好邪惡！」秋生更講笑話：「佢唔好再嚟啦大佬，真係心臟病，今日要去驗身！」

得好友支持同秋生加持，基仔喺電話表示：「好多謝佢哋，Vivian就嚟開演唱會要keep fit，都幫我拍咗條試食片，伊健o依家喺沙漠拍戲，都攞住我盒月餅幫我做宣傳，所以真係好感動。早兩日去捧秋生哥場睇佢嘅舞台劇，諗住中秋就到送月餅畀佢，佢即刻瞪大對眼：『係你㗎，真係好食喎！』嗰下我覺得好開心。」

點解會諗到出芝士月餅？基仔就讚老婆：「我都戥古太開心，呢個創意係古太諗，佢今次好叻仔。」係咪想同嘉麟樓、美心流心奶皇月餅比拼呢？基仔笑笑話：「我哋呢啲小公司，邊斗膽同大品牌鬥呀。」