基金收集貨源歸邊
股路縱橫:品質上升空間大

蘋果日報 2002/04/09 00:00


大戶對「食」官股好整以暇,上個禮拜只買咗1300萬個單位,今次佢哋「攤凍嚟食」,大市喺呢個禮拜,都唔應該會有大作為。
恒指噚日跌107點,最低落到10702,期指全日低水,尾市再弱啲,收10671,低水52點,氣氛認真麻麻。雖然大市短期跌勢未止,但以中長線為出發點,則現水平又係部署低吸嘅大好機會,以10400為止蝕即可。
國企股好勁,指數上升22點,鋼鐵股、航空同個別石化股都有好表現,而基金股亦拍住上,今次中資同外資心意似已相通,好戲會在後頭。
半導體行業復甦之勢已日漸明顯,ASM太平洋(522)同品質國際(243)續見有大手吸納,前者逼近20元大關,收19.95元,升0.3元;後者高收3.775元,升0.15元,成交不足800萬股,貨源似有嚴重歸邊之勢。

半導體業明顯復甦
品質近月走勢形成小圓底,在前高位3.975元水平會有阻力,整固後再上,目標可指向5.0元水平,係一隻短線有頗大機會可賺3成嘅股票。
由於預期的經濟復甦會刺激科技產品的需求,電子消費品包括個人電腦和手提電話等的銷售,將會由谷底強勁回升,半導體行業在今年下半年亦會進入另一個高增長期,未來兩年都可看好。
2月底本欄推介品質,當時股價2.925元,目標看3.5元,其後股價在3月中升到3.975元才出現調整。由於半導體業復甦之勢比預期為強勁,品質整固完成後,升浪將會再現,以基金目前仍密密收集計,品質股價在現水平再翻一番的機會不容抹煞。
金威集團(910)1送2除淨,高收0.445元,升11.25%,由於貨源已歸邊,相信紅股登場時股價亦不會有太大壓力。
郭兆誠