英國滾石樂隊(The Rolling Stones)個主音米積加(Mick Jagger),佢同樂隊本身都有足夠代表性去宣傳英國,而米積加個女Georgia May Jagger亦係上位女模,掹車邊都叫夠資格嘅。最近Georgia着住Roberto Cavalli嘅淺粉紅色長裙,企喺一架巨大無比嘅飛機面前搔首弄姿,旁邊仲有三個大隻欖球球星,甚有裙下之臣觀感。原來英航為力谷呢架A380雙層客機同埋南非航班,專登搵Georgia嚟做襯托,由香車美人升呢做巨機飛女,有靚人又有大力士,擺明係sell架機「睇得又砌得」啦。入到架機,唔係講笑,條樓梯長到足以畀Georgia行貓步,行到攰仲可以撻落頭等張床度唞唞,疏乎度爆燈。