「政壇剩男」律政司司長袁國強一向有吸煙習慣，本身就有一棚煙屎牙，大前年因為要推銷政改方案，就專登去咗洗靚棚牙，仲畀政制及內地事務局局長譚志源讚佢靚仔咗。不過，今日袁國強出嚟回應港獨問題，有眼利嘅記者就睇相留意到佢棚牙好似唔多齊，尤其係下顎棚牙好有問題，八方睇真啲，有一隻門牙仲好似有條裂縫。

八方諮詢過兩位專業牙醫嘅意見，將袁國強棚牙嘅相俾佢哋睇過，不過佢哋就話只係睇相唔係好夠，最好可以親身檢查一下，暫時好難下判斷，不過佢哋都話袁司長棚牙可能有啲咖啡漬或茶漬。兩位專業牙醫又話，牙齒齊唔齊，原來睇遺傳影響多。

既然專業牙醫都咁講，八方建議司長不如都係去檢查吓及洗牙保養吓，事關棚牙有問題可大可小，一陣唔夠牙力，唔止應付唔到記者嘅辛辣提問，面對阿爺越嚟越多嘅施壓，隨時頂唔住要跪低，香港人就多得你唔少。