頭戴小帽的斌仔，剛於早上在醫院接受完電療，下午便已急不及待拉着母親和記者向着夢想國度進發：「行得快好世界，好想快啲去到呀！」
「佢知道有得去海洋公園之後，幾乎晚晚都瞓唔着，又打電話返鄉下同嫲嫲講，去到餐廳又四圍話畀其他小朋友聽，真係笑死人。」斌仔的母親陳太笑不攏嘴地說。
睇鯊魚難掩心驚驚
到達目的地後，斌仔開始旅程的第一站：海洋劇場。坐在觀眾席上的他，每當看到海豚時而在水中翻騰，時而躍出水面，做着各式各樣高難度動作時，都會興奮得拍手歡呼。之後，斌仔帶着惶恐心情踏入鯊魚館，一群群外形兇悍的鯊魚活現眼前，縱有厚厚的玻璃隔着，斌仔仍不禁低聲地說了一句：「佢哋個樣真係好兇殘呀！」
邊坐吊車邊吃熱狗
鏡頭一轉，斌仔來到一個截然不同的平靜海洋世界：海洋館。成千上萬色彩斑斕的魚群游來游去，斌仔彷彿成為牠們的其中一分子。「斌仔你睇吓，嗰度有隻好大嘅海龜呀！」陳太拍拍兒子的肩膀說。斌仔不忘發揮認叻本色說：「媽咪，我一早睇到啦！」
甫「浮」出了水面，斌仔繼而向高空邁進，前往吊車站一嘗當「空中飛人」的滋味，只見他一邊吃着美味熱狗，一邊欣賞腳下景色。
「嘩，下面風景好靚呀，啲船細到好似玩具咁嘅。」斌仔一派悠然自得的模樣，懶理在旁驚得掩面不敢往下望的母親。
由於斌仔期間感到疲倦，只好提早結束行程，但在臨離開之前，他仍堅持要到熊貓館拜訪兩位心儀已久的偶像──安安和佳佳。「邊隻係安安、邊隻係佳佳呀？」斌仔這個似易實難的問題，一下子便把記者難倒。「佢哋食緊竹葉呀，熊貓主要係靠食竹葉㗎。」斌仔以一副專家口吻說。