創維數碼（751）是內地最大型品牌電視製造商，並擁有龐大農村客戶群。不過，自從5月份受累家電節能惠民補貼計劃即將結束，股價就急速下瀉，由約6.60元持續跌到不足4元，一個月跌逾四成，嚴重跑輸恒指的一成跌幅。
作為龍頭股，市場普遍睇好創維，彭博綜合數據，目前近九成大行都給予「買入」評級，只有唔夠一成叫「沽貨」，好明顯對創維投下信心一票。
當中，摩通簡直係長期支持者，就算創維跌到得番3.92元，最新報告都繼續叫「增持」，雖然已經降低目標價，竟然都上望7.50元，即係仲有91%升幅！
該行指創維舊年業績遜預期，係因為研發成本增加，但股價已經跌過龍，仲大派定心丸，話就算冇咗補貼政策，又或者內地房市場需求放緩，創維都仲有一大班農村客仔，銷售一定可以繼續睇好！𠵱家反而係低吸等升的入市良機。

觀望銷售數據至好買

事實上，摩通呢位分析師一直都係創維的大好友，基本上過去幾年都一直叫增持，但股價就未必一定升見目標價，所以，建議各位散戶唔好信晒諗住瞓身入市，最多當做參考指標就夠啦！始終𠵱家內地市場競爭越嚟越激烈，創維在內地兼海外業務都受到挑戰，一日未有省鏡嘅銷售數據，都唔知係咪真係頂得住，都係持觀望態度好過。

瑪姬兒