日本老牌組合SouthernAllStars嘅主音桑田佳祐，早前喺演唱會上攞紫綬勳章開玩笑，結果搞出大頭佛，最近事件似乎越鬧越大，有市民仲去SouthernAllStars所屬事務所Amuse嘅公司總部，帶埋日本旗、拉橫額抗議，要求桑田佳祐向全國日本人公開道歉！

桑田佳祐身為靈魂人物，佢上年獲日本政府頒紫綬勳章表揚，桑田上星期除夕就同隊友開倒數演唱會，當時以直播形象亮相《紅白歌唱大賽》，仲即場唱咗首《Peace&Hi-lite》，有指歌詞內容暗寸首相安倍晉三，咁都唔止，當晚桑田喺台上忽然從屁股後方個褲袋摷出早前獲贈嘅紫綬勳章，佢為咗搞氣氛，仲話要攞呢個勳章即場拍賣，搞到引起唔少政府界人士批評。

其實，桑田唱衰日本政府都唔係第一次，一向偏激嘅議員櫻井誠日前就狠批桑田，認為佢侮辱日本政府同埋皇室，就連韓國方面都借題發揮，有南韓傳媒大讚桑田goodjob，希望佢去韓國繼續唱衰日本喎！