韓國選秀節目《PRODUCE 101》男團版於上周播畢，最後11強嘅練習生將組成男團Wanna One，預計8月出道，不過其中一名16歲成員李大輝今日就突然被爆出疑似裸照。

據韓媒報道，一張疑似係李大輝嘅裸照於網上流傳，相中男子僅穿內褲瞓喺床上，雙手被綁於床邊，另外有一名男子就手拎蠟燭企喺旁邊。

照片公開後，李大輝所屬嘅Brand New Music否認相中人係李大輝，表示：「相中只係一名跟李大輝生得似嘅中國人。」又表示李大輝只得16歲，唔排除會採取法律行動。有網民表示該疑似裸照早於2014年已於網上公開過，李大輝只係跟相中人相似，而韓媒亦已刪走該照片。

另外，男團NU'EST成員白虎（姜東昊）近期因演出男版《PRODUCE 101》而人氣上升，不過昨日被爆8年前性騷擾女學生，白虎所屬事務所昨日已表示會對發文詆毀白虎嘅網民採取法律行動，事務所今日再次回應，指有關性騷擾女學生一事並非事實，將起訴最初散布謠言嘅人。