筆克遠東（752）高息兼係超級現金牛，加埋業務長賺長有，筆克抵捧。筆克主打展覽及市場推廣，受惠祖國經濟高增長，加埋上年嘅上海世博效應，2010年度（10月年結）純利翻半番，到1.9億銀。雖則今年祖國大型盛事欠奉，但食住內地經濟持續增長條水，加埋集團行內享負盛名（經營超過40年），有品牌優勢，繼續長搵長有。
係咁意計數，筆克2011年度及2012年度純利複合增長15%，純利2.2億銀及2.54億銀，預期PE得8.7倍及7.5倍。再講，筆克2010年度，齋計普通股股息，息率回報都上4.7厘，集團手頭淨現金又高達7億銀，高息兼銀彈充裕，防風力有番咁上下。呢轉以筆克2012年度10倍PE做目標，筆克要見2.10元，現價（1.58元）潛在回報率33%，目標PE仍然好平。

長江製衣績優要買

長江製衣（294）2011年（3月年結）上半年，純利一支箭咁飆升咗12倍，到2915萬銀，本業改善係主因。而受惠棉線價繼續keep喺相對高位，相信集團全年度嚟自核心業務嘅溢利一樣咁靚仔。又長江製衣現價（2.14元）嘅NAV折讓高達55%，紡織股當中，集團折讓好吸引。呢轉短打冷吼，博長江製衣升20%到2.57元，集團亦未有耐上到NAV水位。
錢雋