渣打集團（2888）噚日放榜，業績麻麻之餘，又要供股集資，又要炒人，認真多事。剛於上周一離開渣打嘅前輪證部銷售董事林燕玲（人稱小飛俠）反而樂得清閒，噚晚佢着得靚靚出席「上市公司年度大獎2015」頒獎晚宴。小飛俠一襲黑色緊身連身裙、化個淡妝，睇落好精神。
渣打上周正式摺埋輪證部，大家都八卦小飛俠嘅去向，佢噚日高調現身，當然要八吓喇。小飛俠好從容咁話，未有新卡片派，仲放緊假，剛過去嘅萬聖節就去咗朋友屋企玩，最近有好多人問佢去唔去旅行就真嘅，佢都答到冇氣。

陳家強出席酒會笑唔停

其實佢之前已經飛咗去美國探親兩星期，飛得多對皮膚唔好，都係留港休息吧。早前佢接受訪問亦提過，家陣主要跑步、打泰拳、跟朋友見面，追番喺渣打5年因搏殺而失去嘅時光，指人生中有段時間可以休息吓，都係美事。
講番呢個頒獎晚宴，主人家係股票分析師協會，連續第3年舉辦呢個活動，主要鼓勵上市公司與投資者、本地分析員多啲溝通，加強企業管治，共有24間公司獲獎。今年得獎公司包括長實地產（1113）、周大福（1929）等，「新晉上市公司年度大獎」就有今年轉主板嘅譽宴（1483）、受惠「二孩政策」嘅輝山乳業（6863）等。
現場當然有一大班曝光率高嘅股評人喇，證監投資產品部執董梁鳳儀亦都有嚟，財經事務及庫務局局長陳家強就係主禮嘉賓，眼見陳家強全程都同一班股評人有講有笑，心情相當之靚。

李華華
mailto:[email protected]