公民黨幾位巨頭，包括袋巾、湯大狀同譚香文等等，噚日拉大隊去咗中聯辦。可能有人以為佢哋想去示威，實情佢哋只係想向中聯辦，轉交有成千個市民簽名嘅四川大地震弔唁冊。黨主席關信基教授為免中聯辦誤會，已一早「打定底」，上星期親自打電話同中聯辦單咗聲，點知最後仍然係過門不入，望門興嘆。

賑災都玩親疏有別

話說公民黨方面為咗畀中聯辦有個心理準備，一早通知對方佢哋會嚟遞交代表市民對四川死難者一份心意嘅弔唁冊。結果噚日中聯辦亦似乎好放心，啲保安人員冇好似見到長毛嚟咁緊張，亦冇喺門口架起圍欄，只係到場昅實。
眼見防線咁鬆散，公民黨以為「闖關」有望，但結果佢哋喺門口講完嚟緊嘅賑災活動後，諗住直接踩入中聯辦送交弔唁冊之際，突然有個中聯辦職員從大樓殺出，極速「搶收」弔唁冊，又逐一同佢哋握手，擺明唔想畀公民黨入中聯辦大樓，一眾公民黨員最終只能望門興嘆。
有公民黨員笑嘆，民建聯同自由黨賑災，中聯辦就大開中門請佢哋入去；同樣係賑災，佢哋就只可以喺門口到此一遊，真係估唔到中聯辦連賑災都搞親疏有別。