索腿天后陳敏之同拍拖10年嘅圈外男友雷偉信（William），前晚喺一眾親戚同好朋友嘅見證下，喺峇里Conrad酒店一間白色小教堂完成婚禮，聽講今次敏之冇搵到伴娘，只係搵咗一班好友做兄弟同姊妹，大妗姐嘅職責就由嚴淑明同一個由細玩到大嘅好友負責，呢兩個老友認真唔話得，唔單止講咗好多好意頭嘅說話，喺雷生雷太斟茶嗰陣時，仲一唱一和咁話：「飲過新抱茶，型過劉德華」、「飲過新抱茶，靚過林青霞」，𠱁到啲親友同嘉賓鬼咁開心！

嚴淑明送祝福

喺婚禮完咗之後，雷生雷太搞咗個派對，感謝一班親朋好友嘅見證，契姐伍詠薇、好友嚴淑明同黃泆潼等人，仲輪流上台講吓感受，又分別唱歌祝賀一對新人。契姐伍詠薇雖然唔係教徒，但係佢專登唱咗首聖詩祝福一對新人，結果敏之梗係感動落淚，同場唔少親友都好感動。嚴淑明噚日亦喺微博貼咗兩張同敏之嘅合照，仲留言話：「感恩一路上有你，愛是永恆，祝福我的陳寶貝！」
撰文：馮仁昭