當年今日
關於我們

【關你家事咩】江美儀當眾駁阿媽 「曬命婆」肥媽教做人要揸莊

蘋果日報 2017/06/15 01:10

江美儀肥媽關你家事MariaCordero

(新增影片)將人哋家事擺上枱嚟做主題嘅大台節目《關你家事》,喺最新一集就搵嚟屋企有30幾人大家族嘅肥媽Maria Cordero嚟做嘉賓,承繼上集提到故事主角係素人情侶Hawaii同Teddy打算喺今年除夕(12月31日)拉埋天窗,book咗酒席同教堂,但係其他禮金、婚紗相、喜宴座位表等好多細節嘢都未傾同未決定。
搵得肥媽上去,預咗佢一係鬧人一係喊,不過,今次肥媽冇煮飯嗰時咁好火,更不似預期咁冇聲淚俱下,反而輕輕鬆鬆鄧梓峰咁,教路一對新人要有語言藝術,仲叫女主角要做揸莊嗰個,又教佢最緊要o氹掂奶奶。
然後,相信係戲肉,肥媽不停攞自己屋企做例子,晒命自己同奶奶、新抱、女兒同孫關係好,仲勁到四代同堂咁去蘭桂坊飲嘢夜蒲; 另又買化妝品嚟冧奶奶,同教奶奶化妝,但就死口話啲嘢係sample,等奶奶唔使肉赤佢使錢。
另一邊廂,肥媽仲搵咗自己個識咗50年以上嘅朋友上去做現場觀眾,大講同新抱及女婿嘅相處之道。(先提一句,呢位「現場觀眾」最後係得獎嘅…)
節目中另一看點,就係主持人之一嘅江美儀阿媽,都有上呢集做現場觀眾,當另一主持麥長青(麥包)問江媽媽:「想個女個婚禮係點樣嘅呢?」江媽媽坦言:「我冇諗過喎!」江美儀搶韁答:「邊度到佢話事唧?係我嫁!」
麥包本來都仲搭嘴話:「得一粒女…」點知肥媽突破盲腸、指住江美儀話:「你睇吓呢啲咁嘅……教人哋要聽父母話,你睇吓!」咁應該算係自打嘴巴嘅江美儀有乜反應?咪大笑囉…
都話㗎啦,身體很誠實吖嘛!
empty
(電視截圖)
empty
肥媽講父母經,竟然冇喊。(電視截圖)
empty
仲好輕鬆咁高談闊論。(電視截圖)
empty
江美儀媽咪都有現身(電視截圖)
empty
兩母女笑言係咪好似呢?應該唔怕走失。(電視截圖)
empty
肥媽個friend都有做現場觀眾,分享做人奶奶/外母嘅經驗。(電視截圖)