中信泰富（267）前主席榮智健終於再拉頭馬！榮太子噚日憑「飛影」喺尾場跑出，重返闊別多年嘅凱旋門，榮智健太太任順彌、女兒榮明方同埋金管局前總裁任志剛都有到場，一齊影相。
但呢隻馬確係性格巨星，影相前發脾氣，點都唔肯行埋凱旋門，搞到人有人影相，隻馬就喺後面發老脾。
榮太子以前係馬會董事，養過「奔騰」、「活力先生」、「奧運精神」等一代名駒，贏過唔少大賽，可謂叱咤一時嘅大馬主。但自從2008年中信泰富爆出炒燶外滙accumulator之後，佢離開公司亦淡出馬圈。

對上一次已四年前

近年佢重新養馬，不過馬運一般，好似前年買入「奔月」，未跑就退役。「飛影」原定舊年12月底初出，可惜出閘前大發脾氣要退出，直至噚日先至正式在港首次上陣，夥拍安國倫跑二班1,400米，終於一擊即中，喺尾場打響頭炮，令到榮太子再嘗拉頭馬滋味。
翻查榮太子對上一次贏馬係2010年3月28號，當日「來福」由韋達勝出，但榮太子冇到場拉頭馬。噚日就舉家出動，率妻女打氣，佢老友任志剛亦有現身，大夥兒興高采烈地影威水相。榮太子仲親自領取二班自購馬首度勝出特別獎金75萬元支票，名副其實名利雙收！
提起妻女，榮太子女兒榮明方十分低調，當年喺中信泰富任職財務部，爆出炒燶外滙事件後被調職，後來離開，據聞佢𠵱家喺家族控制嘅隆源企業任職。

【消失的頭馬】

李華華
mailto:[email protected]