自從馬會要求練馬師每季要贏夠最低標準頭馬後，近幾季都有練馬師因為累積唔達標而被收回牌照，現有馬房數目亦一直低於原有嘅24個。馬會一貫做法都係等練馬師出缺後，先再安排甄選晉升程序，往往要推遲一季先有新練馬師補上。

大馬房經常面對爆倉問題，但係馬房數目少咗，間接令到唔少中型馬房都出現爆倉嘅情況，更要不情願掃走有用啲馬，以符合馬會養馬量上限嘅標準，否則會被罰。不過，從化訓練基地下年就正式啟用，屆時馬房養馬量進一步放寬，應該可以舒緩部份馬房爆倉嘅問題。

講到累積唔達標，目前最危險當然係李易達同告達理，同樣試過兩季肥佬，再有乜嘢差池就冇得留低。李易達啱啱日馬起孖，好在馬房養馬都超過50隻，季內要贏多10場達標16Win應該樂觀。相對大告距離達標仲有12場，但係馬房得番22隻馬，若季內兵力冇增長，要成功護級真係好高難度。

今季羅富全一開倉就做出非常理想嘅成績，暫時喺練馬師排名榜帶頭，相信當初都冇人估到羅富全咁堅，亦證明本地副練，確係有能力獨當一面，只係一直欠缺機會。未來幾季隨時有練馬師累積肥佬被淘汰，又或者到咗退休年齡，其實馬會都應該諗吓，係咪可以加快晉升多幾個本地副練，最低限度都將馬房數目加回24個。

馬會要求練馬師每季頭馬達標，其實都係想練馬師有競爭力，唔會好似以前鐵飯碗就不思進取。近季升正嘅副練，喺成績以外亦展現咗鮮明鬥志，其實早啲決定升多兩個副練，畀個希望一直默默耕耘嘅幕後人員，絕對合情合理，亦唔會浪費人才。

阿Joe