近年主力喺大陸發展嘅陳曉東，日前喺香港開歌迷聚會，原本一班歌迷同偶像見面應該係好開心嘅事，不過《蘋果》就收到投訴，有讀者指為今次歌迷活動付出220元入場費，不過陳曉東只為部份歌迷近距離接觸及合照，之後因眼睛不適為由腰斬活動，而陳曉東不辭而別嘅行為更令餘下百名歌迷傷心失望。

《蘋果》向陳曉東方面查詢，其香港代理公司朱先生對於有歌迷投訴，噚日陳曉東生日會未簽晒名就離場，佢首先向歌迷致歉，同時解釋噚日陳曉東的確眼睛不適，朱先生表示：「今年5月做咗急性青光眼手術後，其實一直未試過出席超過兩個鐘嘅活動，而東東咁耐無返嚟香港，噚日見到大家都好開心，但到尾段嘅時候雙眼已經好唔舒服，可能因為影咗好多相，有閃光燈，所以隻眼紅晒同不停流眼水，於是大家叫佢先休息。」

朱先生話工作人員見到陳曉東雙眼無好轉都擔心，加上活動都有啲超時，場地催促要交場，於是大家叫陳曉東先行離開：「我哋冇再叫東東出嚟，係我哋處理得唔夠好，但希望大家都體諒。」至於，講到東東之後再出席其他活動，朱先生又話：「嗰個唔係活動，只係東東同親戚食生日飯。不過，令都有歌迷失望，我哋都要講聲唔好意思！」