韓國男團EXO嘅中國成員Lay噚日原本喺韓國仁川機場出發到日本北海道，飛去當地為今明兩晚舉行嘅演唱會做準備，但佢喺機場就突然暈倒，要用擔架床送入院，事後EXO所屬SM事務所話Lay因為睡眠不足而暈倒，醫生話有充足休息就冇事，由於Lay堅持參與演出，所以會因應佢身體狀況而決定會唔會如常演出。

而Lay經過不足24小時休息後，今日同隊友D.O.低調現身機場，佢哋都戴上口罩現身機場，只見Lay個樣一臉倦容，一直頭耷耷，冇乜表情，似乎依然冇乜精神，而佢右手兩隻手指都包住膠布，當中清晰見到膠布上有血跡，睇嚟係佢噚日暈倒時整親，真係要好好休養先得。

另外，EXO代言嘅韓國服裝品牌新推出嘅服飾，被指有抄襲《六龍飛天》男星劉亞仁嘅自家品牌之嫌，唔少網民都覺得兩者好相似，而EXO代言嘅品牌商就否認抄襲，又指韓文同英文混合嘅設計好普遍。