大台早排同時開拍三套重頭劇《溏心風暴3》、《誇世代》同《深宮計》，喺曾勵珍同回巢嘅梅小青互相搶人下，搞到人手嚴重唔夠，亦因為咁，梅小青套《深宮計》惟有諗計請外援包括周秀娜、劉心悠、羅霖同張慧儀等。

外援之中，估唔到就連未試過拍古裝劇嘅玄學家麥玲玲師傅，都要披宮廷服上陣，日前仲上咗橫店成個禮拜拍劇。噚晚玲玲師傅喺微博貼咗唔少古裝扮相嘅相，而小青姐更落場悉心同佢試戲練對白。今日麥玲玲回覆《蘋果》時話：「我喺劇中做金夫人，係金舖老闆，雖然簡單一場戲，不過多謝小青姐親力親為幫手演繹啲對白，真係好專業。不過橫店仲熱過香港，啲古裝衫又好密實，個髮飾又好焗，講幾句對白已經出到成身汗。」