雷神停賽，頭馬分佈比較平均，唔少馬迷覺得更好賭，起碼派彩冇咁乏味。

騎師各有捧場客，但係有幾個演出飄忽嘅騎師，就好多馬迷提起都怕怕。早前停賽復出嘅史卓豐，今季演出大起大落，加上早前騎「雄心速龍」未盡全力斷正，外界對佢嘅印象已經大大扣分。

上屆來港發展嘅史卓豐，騎功雖然未算頂級，但係俾人感覺好有朝氣。唔知點解，今季史卓豐嘅表現開始唔對辦，其實喺騎「雄心速龍」出事前，佢有啲馬真係騎到不知所謂，究竟係信心唔夠跑錯馬，定係鬥志出咗問題，只有佢自己至知。

史卓豐雖然係南非人，但佢喺澳洲開始策騎事業，亦同好多喺香港耐咗嘅澳洲騎師一樣，表現吹無定向風、時蟲時龍，今季嘅史卓豐，表現不穩程度同柏寶不遑多讓，投注上絕非可靠嘅騎師。

更差嘅係，史卓豐陣上亦時有魯莽衝動嘅鏡頭，今季都試過犯規引致連環墮馬。咁啱喺佢停賽期間，有好幾隻佢跑開嘅馬，換人後表現都脫胎換骨。

就嚟又到下季發牌嘅時候，史卓豐都想繼續留港發展，上次日馬復出後見佢都場場搏盡。不過，史卓豐今季策騎紀錄咁差，牌照委員會冇可能當冇事發生，真係要慎重考慮下季係咪應該向佢發出全季牌照。

過去牌照委員會都會監察一啲表現有問題嘅騎師，叫史卓豐陳述吓發牌理由絕對合情合理。

阿Joe