自由黨深水埗區議員李梓敬，最近同經民聯九龍西立法會議員梁美芬發展非一般關係，以後仲會成日見添，因乜解究兩位會「撻著」，莫非有啲意外發生咗......無錯，李梓敬最近有新猶，就係報咗城大法律博士 (JD) 課程，日前開學嘞，第一堂講《基本法》，嗰位教授，之咪就係梁美芬...博士！

李梓敬話呀，報名讀law都同地區工作有關，皆因喺地區上，居民不時諮詢法律意見，如果識多一啲啲，佢覺得可以更幫到居民手。而佢又覺得，近年不時有啲涉及中、港嘅干預風波，都關乎憲法同《基本法》，所以佢想了解更多，better equipped後上陣辯論，都更有料到。

再實際啲講吖，唔排除他日會再參選立法會㗎嘛，而立法會係負責製定法律嘅立法機關，難怪李梓敬話「梗係有相關知識會好啲」，因此的起心肝去讀law，笑稱已成為梁美芬「入室弟子」。咁芬姨教書好唔好？李梓敬話ok呀......都係啱啱開學啫，八方遲啲再問下佢先！

其實現任立法會議員中，都有唔少芬姨嘅學生，包括新民黨容海恩同民主黨許智峯，公民黨東區區議員鄭達鴻亦喺去年報讀咗城大法律課程，加入咗芬姨嘅門生之列。