LEGO近排都有唔少動作，今日又喺九龍灣MegaBox，搞咗個全港首個LEGO City城巿創意冒險展覽；八方懷住一個赤子之心去捧場。

好似今次展覽，就展覽咗LEGO警局、警察、消防局、消防員等模型，連賊仔都有。另外，用咗30萬粒LEGO砌成香港今昔展，好似山頂、大排檔等。小朋友喺周末假期，仲可以參加騎士訓練學校拼砌騎士城堡等，有機會贏到價值999元既騎士移動城堡。展覽會舉行到9月30日。

碰到樂高香港總監Pater，問佢幾時再開多一間專門店，Pater即刻笑笑口放錢落八方嗰袋，解釋話朗豪樂高店Lego Store正名其實係「Lego Certified Store」，獲樂高「認證」專門店。不過，大家最關心唔係個名，係今年幾時再開？Pater話，生意理想，但暫未有計劃，而家只係想同MegaBox合作，喺商場層畀更多人接觸LEGO。