林芊妤（Coffee）同銀行高層男友Weng Chak熱戀1年多，兩人經常被撞見出雙入對，日前佢哋孖住行超市享受平民拍拖樂，被讀者陳先生透過「爆相爆片」分享，着熱褲嘅Coffee企喺6呎高男友身邊，即時變得嬌小玲瓏，仲被虎背熊腰男友遮咗大半個身，十分好笑。

日前晚上8點幾，陳先生喺灣仔嘅一間超市，見到Coffee同男友排隊畀錢，陳先生喺電話表示：「男仔好高大有型，好過之前嗰個，雖然佢哋冇拖手，但見到男友幾照顧佢，中途Coffee發現有嘢買漏咗，男友即刻行出去攞番，買完走嗰陣又幫手攞嘢，兩個都有傾有講。Coffee化咗淡妝，都有啲男人望吓佢。」

對於男友被讀者勁讚，Coffee接受《蘋果》電話訪問時開心表示：「係呀，我男朋友一直都好體貼，對我都好好，嘻嘻！因為太多人讚我男朋友，所以我o依家都冇乜感覺，已經唔會有飄飄然感覺，佢都見過我屋企人好多次，我屋企人都好錫佢。」