做馬主，最鍾意拉頭馬，影番張靚相，向親朋戚友揚威。或說，最緊要贏埋錢喎，WPQT（獨贏、位置、連贏、單T、三重彩）齊中，先至威上加威。重未夠，還要事先宣揚，叫晒親朋戚友落飛，一齊扑中，咁就眾人三呼萬歲，威過做皇帝咯。
可惜呢類威風，十居其九都係發夢先至有，或者你係「精英大師」馬主啦。一般馬主，最緊要贏頭馬、攞獎金、影靚相，至於買唔買中，冇所謂咯，學夏佳理主席話齋，頭馬獎金有數十萬元，自己邊會落咁重飛呀？好似香江獅子會會長何志豪咁，隻「糖果之星」贏完再出，預備捧盃，臨場熱到得兩倍，何公子與老父何壽南及大班朋友，齊集沙圈，何公子手握大雪茄，預備咬住嚟拉頭馬。嚡，點知一出閘，沿途俾「鞍山快馬」頂住，前面有隻「馬無敵」，於是冇法子拉出嚟打衝鋒，就此輸咗，你話幾冇面呢！何氏父子點會志在贏錢，要捧盃之嘛，咁樣輸，好冇癮啫。

到咗隻「鞍山快馬」去快活谷跑千二米，排二檔，勝在磅輕，但因往績不佳，幕後冇人有信心，團體馬主之中幾位冇到場。哈，奇事年年有，呢鋪特別犀利，入閘前三分鐘，「鞍山快馬」嘅賠率由十二倍、十倍，突然急跌到五倍，識計數之人都知道有賭徒重槌落咗近一百萬元賭W。但馬主之中，有教授、博士、醫生與寫稿佬，根本唔會賭大錢，養馬只為興趣，然則有乜人咁有信心，擺一百萬落見習騎師黎海榮以及一隻今季最叻跑第四嘅「鞍山快馬」？木宰羊，「鞍山快馬」果然表現甚好，幾乎贏得，點知螳螂捕蟬，黃雀在後，俾一隻二十幾倍冷馬「只因有你」𡁻咗！已是機關算盡，失諸交臂，啲叻仔要吸收吓教訓先至得嘅。